تباتة ورخامة اخر حاجة

حوار يحرق الدم
واحد
غلس وواحد تبت .. التبت قال للغلس علمني الغلاسة .. الغلس راح متصل بأي
نمرة وقالها ممدوح موجود ؟ ردت عليه واحدة قالتله مفيش حد هنا بالإسم ده
.. راح متصل تاني وقالها ممدوح موجود قالتله مفيش حد هنا بالإسم ده .. راح
متصل تالت مرة وقالها ممدوح موجود قالتله مش قلتلك مفيش حد هنا بالاسم ده
..إيه الغلاسة دي !!
قاله كده أنا علمتك الغلاسة قاله علمني انت التباتة .. راح التبت متصل بنفس النمرة قالها : أنا ممدوح حد سأل عليا ؟؟
هههههههههههههههههههههههههههههه
وبعد هذا الفاصل الضاحك وهي كانت مثال لمعاكسة تليفون واللي احنا علمناها فعلا أيام الشقاوة...
ههههههههههههههههههههههههههههههههههههههههههه
جايب لكم حوار بين التبت والغلس ..
أنصحكم يا جماعة كل واحد يجهز نفسه للجاي دي أصعب تجربه هتمر بيها في حياتك ..

يبدأ الحوار .
- صخرة وقعت من فوق العمارة لوح الازاز اللى تحتها متكسرش لية ؟
عاشان ماوقعتش عليه
- طب فرخة بتعدى الشارع ماتت فجأة لية ؟
الصخرة وقعت عليها
- لية ملخفن بيحط جنبه كباية شاى وهو نايم ؟
علشان الشاى منبه
- طب لية بيحط جنب كباية الشاى فنجان قهوة ؟
علشان لو الشاى مرنش
- طب لية بيحط جنبه كباية مية فاضية و كباية مليانة ؟
علشان ممكن يشرب و ممنك ميشربش
- و ليه بيحط ملح على راسه ؟
علشان يبقى حدق
- و ليه بيحط سكر على الكرسى قبل ما يقعد ؟
علشان تبقى قعدته حلوة
- حاجة طايرة فى السما و بتقول نياو اية هى ؟
قطة بيضاء مضروبة بالشلوت
- طب حاجة سودة طايرة فى السما و بتقول نياو اية هى ؟
غراب بيستهبل
- طب حاجة بنى طايرة فى السما و مبتقولش اى حاجة اية هى ؟
فردة الجزمة بتاعة الراجل اللى ضرب القطة البيضاء
- طب حاجة سودة طايرة فى السما و مبتقولش حاجة اية هى ؟
غراب عاقل و مبيحبش الاستهبال
- حاجة زرقاء طايرة فى السما اية هى ؟
ذبابة لابسة بنطلون جينز أزرق
- طب حاجة سودة و فيها خط أحمر و طايرة فى السما من الشرق للغرب
اية هى ؟
ذبابة لابسة فستان سواريه و حاطة روج و رايحة فرح واحدة صاحبتها
- طب حاجة سودة و فيها خط أحمر و طايرة فى السما من الغرب للشرق
اية هى ؟
نفس الذبابة نسيت حاجة فى البيت فرجعت تجيبها
- حاجة سودة ماشية فى الصحراء اية هى ؟
سرب نمل رايح يعزى
- نقطة سودة على الحيطة اية هى ؟
ذبابة
- طيب نقطتين سود عالحيطة ؟
فيشة .
- طب 3 نقط سود على الحيطة تبقى اية ؟
ذبابة و فيشة
- طب 54 نقطة سودة على الحيطة تبقى اية ؟
يبقى الدهان بيقشر
- حاجة رفيعة و طويلة و لونها أبيض اية هى ؟
فتلة بيضاء
- طب حاجة رفيعة و طويلة و لونها اسود تبقى اية ؟
خيال الفتلة البيضاء
- ايه هو الحيوان الاخضر الصغير اللى بياكل الزلط ؟
هو ابن الحيوان الأخضر الكبير اللى بياكل الزلط
- ايه هو عكس كونكريت ؟
لا تكن كريت
- ايه هو عكس تلميذات ؟
Don't tell me that
- ليه الثعلب تخين ؟
علشان الثعلب fat fat
- حاجة ماشية على الارض و بتعمل زززززززز _ ايه هى ؟
صرصار راكب موتوسيكل
- طب ناس دخلوا شقة فعرفوا ان فيها صراصير _ عرفوا ازاى ؟
لقوا الموتوسيكلات راكنة جنب البلاعة
- تعرف تقوللى فرقين بين الليمون و الزيتون ؟
1 - فيه ليمونادة و مافيش زيتونادة
2 - تقدر تقول الناس لامونى لكن ماتقدرش تقول الناس زاتونى
- طب تعرف تقوللى 5 فروق بين الوزة و البطة ؟
1- تقدر تحلق شعرك زلبطة لكن ماتقدرش تحلق زلوزة
2 – فيه رحالة اسمه ابن بطوطة لكن مافيش رحالة اسمه ابن وزوزة
3 – تقدر تبلبط فى البحر لكن ماتقدرش تبلوز فيه
4 – كلنا بنتغطى فى الشتاء ببطانية لكن مبنتغطاش بوزانية
5 – الوزة كانت زمان بطة لكن الشيطان وزها
- طب تعرف تقوللى 5 فروق بين الفيل و النملة ؟
1 – رجل الفيل ممكن تنمل لكن الرجل النملة مش ممكن تفيل
2 – البيت ممكن يبقى فيه نملية لكن مش ممكن يبقى فيه فيلية
3 – تقدر تاكل سمك فيليه لكن مش ممكن تاكل سمك نمليه
4 – كل واحد له بروفيل لكن مالوش برونملة
5 – you can feel but you cannot namla
- ايه الفرق بين الفيل و البرغوت ؟
الفيل ممكن يتملى براغيت لكن البرغوت مش ممكن يتملى فيلة
- ايه عكس زمان ؟
The woman
- ايه عكس نجوم ؟
نجعد
- ليه القطر بيصفر قدام الاجزاخانات ؟
علشان القطرة تطلع
- طب ليه الكاسيت مبيخلفش ؟
علشان بنحطله شريط
- و ليه الكتكوت مابيعرفش يكذب على الفرخة ؟
علشان هى اللى فاقساه
- ليه القطر بيقف على المحطة ؟
علشان مابيعرفش يقعد
- طب و ليه بيمشى بعد كدة ؟
علشان زهق من الوقفة
طب بيضة وقعت من البرج و ماتكسرتش – تفتكر ليه ؟
وقعت على الناحية المغسولة بمعجون الاسنان كرست
- ازاى تحط غزالة فى التلاجة على 3 خطوات ؟
نفتح التلاجة و نحط الغزالة و نقفل التلاجة
طب ازاى نحط الفيل فى التلاجة على 4 خطوات ؟
نفتح التلاجة و نشيل الغزالة و نحط الفيل و نقفل التلاجة
طب فيه طيارة شايلة أجهزة كهربية و حصل فيها عطل فلازم نرمى
اثقل جهاز – نرمى ايه ؟
نرمي التلاجة عشان الفيل جواها .
- واحد بيعوم مات فجأة – تفتكر ليه ؟
علشان التلاجة اللى فيها الفيل وقعت عليه
- ليه النملة بتقعد جنب البحر و هى بتقرأ ؟
علشان تبل ايدها كل ما تيجى تقلب الصفحة
ليه مبتاخدش الفيل قصادها على العجلة ؟
علشان بيقعد يلعب فى الجرس
- و ليه مابينزلوش البحر فى وقت واحد ؟
علشان مافيش معاهم غير مايوه واحد

- ليه الفيل مابيسلمش على النملة بايده ؟
علشان بتضغط على ايده و هى بتسلم فبتوجعه
ليه النملة مابتنامش جنبه ؟
علشان الشيطان شاطر
- ازاى نحط فيل فى ازازة ؟
نزقه و هو بيشرب
و ازاى نحط فيلين فى ازازة من غير ما يلمسوا بعض ؟
نحط بينهم فيل تالت
- ازاى نصطاد الفيل الاحمر ؟
نصطاده ببندقية الفيل الاحمر
- طب ازاى نصطاد الفيل الاخضر ؟
نستناه لما يستوى و بعدين نصطاده ببندقية الفيل الاحمر
طب ازاى نصطاد الفيل الازرق ؟
نكسفه – وشه يحمر – نقوم نصطاده ببندقية الفيل الاحمر
ازاى نقعد 4 فيلة فى عربية فولكس ؟
نقعد 2 ورا و 2 قدام
- طيب و مين اللى يسوق ؟
اللى معاه رخصة
طيب ازاى نقعد 8 فيلة فى عربية مرسيدس ؟
نبيع المرسيدس و نشترى عربيتين فولكس و نقعد فى كل عربية 2 ورا و 2 قدام

ليه النملة مابتتجوزش عامود النور ؟
علشان شوارعى
- دكتور اتجوز محامية و خلفوا ولد يسموه ايه ؟
يسموه أحمد على اسم جده
- واحد شرب بنزين و راح المستشفى جرى و على الباب وقع – ليه ؟
البنزين خلص
- ليه القطنة مش حتدخل النار ؟
علشان مدام نظيفة قالت القطنة مابتكدبش
ايه الفرق بين المزرعة و البطاطس النصف مقلية ؟
دى فارم و التانية فارم فريتس
ايه الفرق بين القلة و الزير ؟
فيه فوازير و مفيش فواقلة
ليه الموسة مراحتش ميعاد الموس ؟
علشان كانت نسيت nacet
طب ليه مراحتش الميعاد اللى بعده ؟
علشان كانت نسيت تو nacet 2
ايه الحاجة اللى بتطفوا على سطح الميه و أول حرف منها ح ؟
حتة خشبة
- ايه الحاجة اللى بتطفوا على سطح الميه و أول حرف منها ب ؟
برضه حتة خشبة
- ايه الحاجة اللى بتطفوا على سطح الميه و أول حرف منها ن ؟
نفس حتة الخشبة
- ايه الحاجة اللى بتطفوا على سطح الميه و أول حرف منها ه ؟
هى هى حتة الخشبة
- ايه الحاجة اللى بتطفوا على سطح الميه و أول حرف منها ألف ؟
انت مابتتعلمش ما قلت لك حتة الخشبة
- ليه ملخفن بيدهن شقته باللبن ؟
علشان تبقى الشقة ملك
- ليه ملخفن بيلبس عمة ؟
علشان يعرف راسه من رجليه
ليه ملخفن بياخد معاه شومة و هو طالع الجبل ؟
علشان لو الشمس ضربته يضربها
- ليه ملخفن بيلبس النضارة و هو نايم ؟
علشان يشوف مين اللى بيحطله العماص فى عينيه
- ليه ملخفن بياخد الشمسية معاه و هو بيعوم ؟
علشان لو الدنيا مطرت

ليه الصعيدى قتل أبوه ؟
علشان يطلع رحلة الايتام
- طب ليه قتل عمه ؟
علشان ابن عمه يطلع معاه
- طب ليه قتل خاله ؟
علشان الاجرام بقى فى دمه
- طب ليه انتحر بعد كدة ؟
علشان الرحلة اتلغت
- ليه الصعيدى بيحط رجله على الشباك و هو نايم ؟
علشان يكعبل الناموس
- طب ليه بيحط جنبه دودة لما ينام ؟
علشان الدكتور قاله لازم تانم 7 ساعات (معدودة)
- طب ليه الصعيدى بيقعد فى حفرة ؟
علشان يفكر بعمق
- طب ليه بيدرس فوق السطوح ؟
علشان يعمل دراسات عليا
- طب ليه بيروح يذاكر مع الشيطان ؟
علشان سمع الناس بتقول ان الشيطان شاطر
- ليه الخشب يتيم ؟
علشان مقطوع من شجرة

بالشفاا يا جماعة

فعلااااااااااااااااااااااااااااااااااا
رخامه وتباته جامد
شكرااااااااااااااااا جداااا ودايما تتحفنا Basketball

إيه يا باشا الرخامة دي

حاجة جامدة والله

» مسرحية شاهد ماشافش حاجة لمرتضى منصور وعمرو اديب